Tröllaskagi er gríðarmikið fjalllendi, allt að 120 km langt og 60 km breitt, milli Skagafjarðar og Eyjafjarðar. Tröllaskagi nýtur vaxandi vinsælda sem útivistarsvæði, bæði gangandi og ríðandi ferðamanna.Margir tindar á skaganum ná yfir 1200 m.y.s., en hæst er Kerling (1538 m). Nokkrir litlir jöklar eru einnig í fjöllum og dölum. Margar fornfrægar gönguleiðir eru yfir Tröllaskaga, s.s. Heljardalsheiði, Hjaltadalsheiði, Hólamannavegur, Svarfdælaleið og Tungnahryggsleið.

Hólaskóli, í samstarfi við fjölmarga aðila, hefur gefið út tvö útivistarkort í mælikvarða 1:50.000 af Tröllaskaga. Þar eru merktar inn bæði styttri og lengri leiðir, með ýtarlegum upplýsingum fyrir útivistarfólk.